「我唔敢再拍拖啦！真喺會有人永遠愛我咩？」、「以前做咗傻仔，為咗佢付出曬所有嘢。依家拍拖唔會再咁上心啦！」、「搵個唔喺最愛，但適合嘅另一半可能先係最啱自己⋯⋯」。

呢啲熟悉嘅說話，可能喺你身邊嘅親友提及過，亦可能曾經喺網上討論區見過，而佢哋都曾經經歷過一段刻骨銘心嘅愛情，可能當中唔多唔少都有過創傷，先得出呢啲日後佢哋深信不疑嘅愛情哲理。

雖然大家都會驚失戀帶嚟嘅傷害，但大部分人又會想追求愛情，喺咪好矛盾呢？我哋生而為人，同樣渴望愛與理解，有啲人話朋友同屋企人都做到啦，但喺伴侶之間嘅親密感、激情及承諾都令到有人覺得人生中無咗愛情唔得。

好幸運地以為收獲到幸福，當想認真維繫一段關係個陣，就會盡自己努力令對方開心，自然就會對一段關係有期待，期待兩個人可以一直行落去，以為「對的人」會一直陪伴自己、照顧自己。

感情嘅初期，兩個人如漆似膠，覺得雙方喺命中注定，心裡面諗終於搵到一個可以比自己安心同依賴嘅Soulmate。但愛情點會一帆風順呢！兩個人開始面對衝突、分歧嗰陣，就會諗呢個人喺咪真係適合我，開始驚失去呢個咁重要嘅人，或者驚自己同呢個人繼續落去唔會幸福。

為咗呢段關係可以行落去，有一方會苦苦堅持，配合同遷就對方，成日覺得患得患失；另一半亦會發現對方無咗自己，失去咗吸引力，而且一直承接對方嘅負面情緒，安慰完佢又會再黎過，直到有一方覺得攰就會完結段感情⋯⋯

總有人曾經受過愛情嘅傷，有啲人會接受唔到一段無結果嘅感情，而唔再相信愛。而有人曾經都受過唔同嘅傷害，希望愛情可以治癒自己。如果要喺呢度去討論點樣先喺一段健康既愛情，真喺有排講。

「我們依附於人與物，如同溺水之人緊緊抓住一根浮木。修習不執著並與他人分享這樣的智慧，我們施予無畏這一饋贈。萬物無常，剎那不住，聚散離合，快樂卻可長留。」

一行禪師講過，成為一個唔恐懼同唔執著嘅人先可以令我哋真正快樂，當我哋學識點樣令自己令自己快樂，學識面對人生嘅種種難關，從而傾聽，擁抱及轉化自己嘅痛苦，都可以為自己同其他人都帶來幸福。

真愛嚟臨嗰陣，其實都幫到你辨識、擁抱及分擔你伴侶嘅痛苦，成為一個自己都可以被自己或他人依靠嘅人，把握每一個當下去好好生活，愛護身邊嘅人，唔去擔憂亦唔多想未發生嘅事。

幸福其實一直都在，真愛都離你唔遠！祝大家都成為自己同其他人嘅太陽，溫暖自己、溫暖其他人！