今年考DSE ，自從開學到而家，每日除咗上堂，就係補課，每日都好累。之前上週會，講升學資訊，啲資訊多到真係唔識揀。其實自己讀書唔上唔落，入到大學當然好，但又好似冇咩信心，見身邊的同學，好似唔駛點溫書，都可以考到好好成績，心就好葡萄。點解佢哋可以甘叻，而我就成日溫完就唔記得。我知道人比人，比死人。一方面，知道不應該比較，但每次見到佢哋甘輕鬆，我就日溫夜溫，就覺得自己好慘，不停諗，如果有佢哋甘叻就好。越近DSE, 個人就越嚟越擔心，又唔敢同屋企人講。同啲朋友講，佢哋就話你都一定入到U , 唔明點解甘緊張，多餘。我...... 都冇氣再講下去。佢哋根本唔明白我。我都想輕鬆啲，但真係做唔到，我自己都唔想。 

有一日返學，行過條天橋，突然間，有個諗法，想跳落去，個一刻，唔知點解個人突然有自殺的諗法，也坐在係天橋不停咁喊。一陣之後，有個人拍我膊頭，我望上去，原來係我體育老師miss 朱，佢好溫柔問我發生咩事。這一刻，我忍唔住係咁喊，同佢講我好辛苦，也唔知點解會有想死的諗法，好驚。Miss 朱陪咗我一陣，同我講：「唔駛怕，每個人都有軟弱的時候，俾我陪你一陣，但我要打電話返一返學校，通知老師我遲返。」之後，佢陪我坐咗1小時，又買野食同野飲俾我，其實老師冇問我任何野，但這份陪伴，令我覺得好舒服，覺得身邊有人可以依靠！ 

謝謝你，Miss 朱！